Қазақстанның барлық аймағы коронавирустық инфекциямен аурудың жасыл аймағында болғанына қарамастан, әлемнің бірқатар мемлекетінде жағдай ушығып барады. Бұл туралы денсаулық сақтау министрлігі мәлімдеді, деп хабарлайды DalaInform.
Осыған байланысты үкімет отырысында ведомство басшысы Алексей Цой инфекцияның енуіне және таралуына жол бермеу мақсатында 5 қазаннан бастап шетелмен әуе қатынасын қалпына келтіруді тоқтата тұруды, әуе бағыты ашылған елдермен рейс санын арттырмауды, Түркияға рейстерді азайтуды ұсынды.
«Екінші санаттағы мемлекеттерден келетін адамдар үшін мынадай міндетті талаптар белгіленсін: термометрия, сауалнама, алынған күнінен бастап 3 тәуліктен аспайтын уақыт аралығында COVID-19-ға тексерілгені туралы анықтаманың болуы. Анықтама болмаған жағдайда шетелден келгендер коронавирусқа зертханалық тексеру жүргізу үшін карантиндік стационарда 2 тәулікке дейін оқшауланады. Осыған ұқсас талаптарды ЕАЭО елдері әрі Өзбекстанмен автоөтпе жолдардағы өткізу пунктерінде мемлекеттік шекараны кесіп өтетіндерге қолдану ұсынылады», – деді министр.
Осыған байланысты ол облыстар, Алматы, Нұр-Сұлтан, Шымкент қалалары әкімдерінен карантиндік ауруханаларды шекара бекеттінде орналастыру мен келушілерді тексеруді сұрады.
