Биыл бірінші болып тұмауға қарсы екпе салдырғандардың бірі – денсаулық сақтау министрі, деп хабарлайды DalaInform тілшісі ведомствоға сілтеме жасап.
Бүгін елімізде республикалық вакцинация науқаны басталды, осы орайда ведомство басшысы Нұр-Сұлтандағы №6 қалалық емханаға барып, екпе салдырды.
«Жылда күз келгенде ЖРВИ мен тұмау өршиді. 2019-2020 жылғы эпидемиологиялық маусымда ЖРВИ-мен ауырған 431 120 адам тіркелді. Оның ішінде 2 жарым мыңнан астам науқас зертханада анықталған тұмауға шалдыққан. Оның 284 033-і немесе 61,4 пайызы 14 жасқа толмаған балалар. Биыл халықты вакцинациялау аса қажет, өйткені коронавирус пандемиясы кезінде тұмау да өршуі мүмкін, сол кезде елдегі жағдайды тұрақтандыру қиын болады. Сондықтан бұл жолы елімізде екпе салуды жылдағыдан екі апта бұрын бастаймыз. Қазақстан қауіпсіз, тиісті зертханалық сынақтардан және бақылаудан өткен, сапалы вакцина сатып алғанын көрсету үшін өзім бірінші боп екпе салдырдым», – деді министр Цой.
2020 жылы Қазақстанда вакцинация науқаны 15 қыркүйек пен 15 қараша аралығында өтеді. Бірыңғай дистрибьютор халықтың 10 пайызынан астамын тегін егу үшін Ресейде өндірілген «Гриппол+» вакцинасының 2 милионнан астам дозасын сатып алды. Екпе құрамында тұмаудың үш штаммы – А(H3N2), А(H1N1) және В қарсы антиген бар.
Вакцинация тәуекел тобына кіретін адамдар үшін тегін, атап айтқанда: мектеп жасына толмаған әрі мектеп жасындағы балалар; медицина қызметкерлері; жүкті әйелдер (жүктіліктің 2-3 триместрі); жабық мекемелердегі азаматтар (балалар үйі, мектеп-интернат); созылмалы ауруы бар ересектер әрі балалар; 60 жастан асқан қарттар.
Айгүл ЕЛТАЙ
