Бүгін Елбасы Нұрсұлтан Назарбаевтың жары Сара Назарбаева мерейтойлық белесін бағындырды. Ол 80 жасқа толды деп хабарлайды Dalainform тілшісі.
Тәуелсіз Қазақстанның тұңғыш президентінің жары 1941 жылы 12 ақпанда Қарағанды облысында туған. Үш қыздары бар – Дариға, Динара және Әлия және олардан немере-шөбере көруде.
Көп уақыттан бері қоғамдық жұмыспен белсенді түрде айналысудағы туған күн иесі, 1992 жылдың ақпанынан бастап халықаралық «Бөбек» балалар қайырымдылық қорының негізін қалап, қызметін жүргізуге септігін тигізуде. Қайырымдылық саласындағы еңбегі үшін түрлі халықаралық марапатқа лайық деп танылған.
Осы орайда, ұзақ уақыттан бері ел алдына шықпаған Сара Назарбаева, жақында бала тәрбиесіне арналған форумға қатысып, Қазақстан халқын ар-намыстан аттамай өмір сүруге және бір-біріне құрметпен қарауға шақырды.
«Адамның құндылығы неде? Кесіріңді тигізбе. Алдама, арыңа қарсы жүрме. Адамгершілігің болсын. Адам бол. Еркек болсын, әйел болсын, адам болуға міндетті. Өзіміз үшін, өз жанымыз үшін. Солай істеуіміз керек», – дейді «Бөбек» қорының президенті.
