Ішкі істер министрлігі әкімшілік полиция комитетінің төрағасы Мұрат Баймұқашев Қазақстандағы тұрмыстық зорлық-зомбылық жайлы айтты, деп хабарлайды DalaInform тілшісі.
«Тұрмыстық зорлық-зомбылық проблемасы Қазақстанда ғана емес, бүкіл әлемде бүгінгі күннің өзекті тақырыбына айналып отыр. Коммуникация мен әлеуметтік желілердің дамуына байланысты жақын адамдарға қатысты жасалған ауыр қылмыстар үлкен қоғамдық резонанс тудырып келеді. 2019 жылдың қорытындысы бойынша, 1 мыңнан астам осындай заң бұзушылық тіркелді, өсім оның алдындағы жылға қарағанда 14 процентті құрады. Биылғы жылдың 9 айында аталған құқық бұзушылықтардың 0,4 процент өсімі болды. Егер былтыр осындай 758 факт тіркелсе, биыл олардың саны 761-ге жетті. Тіркелген қылмыстық заң бұзушылықтардың жалпы санында олардың үлес салмағы 1 процентті құрады», – деді Баймұқашев ведомство алаңында өткен брифинг барысында.
Айгүл ЕЛТАЙ
