Ағымдағы жылдың 1 қыркүйегіндегі жағдай бойынша 9,9 мың адам тарихи Отанымен табысып, оралман мәртебесін алды деп хабарлайды Dalainform тілшісі.
Жалпы, Тәуелсіздіктің 30 жылдығы қарсаңында, 1991 жылдан бері Қазақстан Республикасына 1 миллион 67,2 мың этникалық қазақ оралды.
Осы жылы Қазақстанға оралмандардың жартысынан көбі (59,1%) Қытайдан, 25,6% Өзбекстаннан, 8,8% Түркіменстаннан, 3,5% Моңғолиядан және 3% басқа елдерден атажұртына табан тіреді.
Келген этникалық қазақтар негізінен Алматы (54,6%) және Маңғыстау (12,7%) облыстарына, сондай-ақ Нұр-Сұлтан (4,1%) және Шымкент қалаларына (3,1%) қоныстанды.
«Келушілердің ішінде 60%-дан астамы еңбекке жарамды жаста, ал шамамен 5%-ы ғана зейнеткерлер. Оралман мәртебесін алғандар, Қазақстан азаматтарымен қатар, Жұмыспен қамтудың жол картасы шеңберінде жүзеге асырылатын жобалар аясында, жұмыспен қамту орталықтары арқылы жұмыс таба алады», – дейді ҚР Еңбек және халықты әлеуметтік қорғау министрлігі комитеті көші-қон мониторингі басқармасының басшысы Дастан Айтқұлов.
Айта кету керек, 2019 жылдың осы кезеңінде 9,6 мыңға жуық этникалық қазақ оралман мәртебесін алды, оның ішінде 53% Өзбекстаннан, 26% Қытайдан, 21% Моңғолиядан, Түркіменстаннан және басқа елдерден келді.
Еске сала кетсек, қазіргі уақытта Мемлекет басшысы Қасым-Жомарт Тоқаевтың ұсынысымен, «оралман» термині «қандас» сөзіне ауыстырылуда.
