Қарағандыда микрокредиттік ұйымға қарақшылық шабуыл жасап, кассир әйелді бөтелкеге құйылған бензинмен қорқытқандар құрықталды деп хабарлайды Dalainform тілшісі.
9 ақпан күні медициналық маскадағы белгісіз екі адам қаладағы шағын несие беру мекемелерінің біріне қарақшылық шабуыл жасағанын жазған болатынбыз. Олар кассир қызметкерге жағып жібереміз деп үрей ұялатып, ондағы бар ақшаны алып кетіп еді.
«Криминалдық полиция қызметкерлері өткізген жедел іздестіру іс-шарасының нәтижесінде аталған қылмысқа қатысы бар деген күдікпен 19 және 28 жастағы екі азамат ұсталды. Ұсталған азаматтар жасаған қылмыстарын мойындады. Олар уақытша ұстау изоляторына қамалып, тергеу амалдары жүргізілуде», – дейді Қарағанды облыстық полиция департаментінің бастығы Ерлан Файзуллин.
