Атырау облысында мемлекет мүлкін талан-таражға салғаны үшін мәдениет саласының қызметкері 7 жылға бас бостандығынан айырылды, деп хабарлайды DalaInform қаржы мониторингі агенттігіне сілтеме жасап.
Атырау қаласында «Атырау облысы мәдениет, архивтер және құжаттама басқармасының облыстық ғылыми-әдістемелік халық шығармашылығы мен мәдени демалыс қызметтерін ұйымдастыру орталығы» КМҚК қызметкеріне қатысты қылмыстық кодекстің 189-б. 4-б. 2-т. бойынша қылмыстық істі тергеу аяқталды.
«Аталған қызметкер қызмет бабын пайдалана отырып, жалпы құны 70,9 млн теңге болатын музыкалық аппараттарды иемденіп, ломбардқа өткізген әрі өз таныстарына төмен бағаға сатқан. Сотқа дейінгі тергеп-тексеру барысында 50,9 млн теңгені құрайтын келтірілген мүліктік залалдың 70%-ы өтелген. Атырау қаласы сотының үкімімен кәсіпорын қызметкері кінәлі деп танылып, оған 7 жыл мерзімге бас бостандығынан айыру жазасы тағайындалды», – делінген ақпаратта.
