Қазақстанда Алматы облысы Алакөл ауданы Қызылащы ауылының тұрғындары алкогольдік ішімдікке қарсы акция ұйымдастырды деп хабарлайды Dalainform тілшісі.
Иен далада қазылған шұңқырға қорап-қорап шөлмекті сындырған адамдар аталған эстафетаны келесі ауылға жолдап, қазақстандықтардан әрі қарай жаппай жалғастырып әкетуді сұрады.
Бейнежазбада «Арақ атамыздан қалған ас емес» деп ой қозғаған азаматтар баласы араққа салынып, маскүнем болып кеткен көптеген ата-ананың жанайқайын жеткізгісі келетіндерін атап өтті.
«Біз осылайша болашақта талай жамандықтың бетін қайтарып, тағдырларды жақсылыққа өзгертуге ниеттіміз. Себебі қаншама адам осы арақтың кесірінен өмірден өтуде. Бұл қадамды эстафета ретінде жариялаймыз», – деді ауыл жастарының өкілі.
Шараға қатысушылар дүкендерде сатуды тоқтатуға шақырып, желіде пікір білдірушілердің ризалығына ие болып жатыр.
Осы орайда Дүниежүзілік денсаулық сақтау ұйымы ішімдікке салынумен күресте әлем мемлекеттеріне Қазақстан мен өзге де ТМД елдерін үлгі ретінде келтіруде. Мәселен тиісті іс-қимылдар аясында алкогольдік өнімдерге акциз бағасы көтеріліп, жарнама жағы тәртіпке салынды, сондай-ақ арақты бей-берекет сатуға тыйым салынуда.
