Елордада 2 мың адамның қатысуымен ұтыс ойынын өткізген кәсіпкерлер тұрғындардан кешірім сұрады, деп хабарлайды DalaInform әкімдікке сілтеме жасап.
Атап өтсек, 7 ақпанда қалада 2 мың адамның қатысуымен жаппай іс-шара өткізудің жолы кесілді. Жаңа филиалдың ашылуына орай Romantic гүлдер орталығы лотерея ұтыс ойынын өткізген болатын. Жаппай іс-шара Мәңгілік ел даңғылында ұйымдастырылды. Нәтижесінде адам көп жиналғандықтан кептеліс пайда болды. Ал қатысушылар маска режимін, әлеуметтік қашықтықты сақтамай, вирустың таралу қаупін арттырды.
Бұқаралық іс-шараны өткізген ұйымдастырушылар бас қала тұрғындарынан бейнеөтініш түрінде келтірілген залал үшін кешірім сұрады.
«Romantic гүлдер орталығы Нұр-Сұлтан тұрғындарынан кешірім сұрайды. Болған оқиға үшін барлық жауапкершілікті өз мойнымызға аламыз. Іс-шараларды өткізу үшін қойылатын талаптар мен бас санитарлық дәрігердің нұсқамасы бұзылды. Шаһарымызға ға және жұртшылыққа келтірілген қолайсыздықтар үшін жауапкершілікті көтеруге дайынбыз. Бұл іс-шара әкімдіктің және басқа да мемлекеттік органдардың келісімінсіз өткізілді. Тұрғындар алдында кешірім сұраймыз. Біз қалыптасқан жағдайдың ауырлығын түсінбедік», – деді гүл орталығының атқарушы директоры Темірлан Кенжебаев.
Дүкен иелері ҚР ӘҚБтК-нің 425-бабы, бірінші бөлігі бойынша әкімшілік жауапқа тартылды. Оларға 230 АЕК немесе 670 910 теңге мөлшерінде айыппұл салынды. Кәсіпкерлер кінәсін мойындап, айыппұлды 7 күн ішінде өтеуге келіскендіктен, төлем мөлшері 115 АЕК немесе 335 455 теңгені құрады.
