Қазақстан халқы Ассамблеясы өз қатарынан Парламент Мәжілісіне депутат етіп сайлайтын азаматтарды қарастырып жатыр деп хабарлайды Dalainform тілшісі.
Елбасы Нұрсұлтан Назарбаев төрағалық ететін ҚХА шешімімен төменгі палатаға 9 үміткер ұсынылуда: Сауытбек Әбдірахманов, Аветик Амирханян, Ильяс Буларов, Наталья Дементьева, Юрий Ли, Вакиль Набиев, Шамиль Осин, Владимир Тохтасунов және Абилфас Хамедов.
Бұдан бөлек, «Қоғамдық пікір» ұйымы жүргізген exit poll нәтижесінде, әзірге Мәжіліске 7 пайыздық межені бағындырған үш партия: 9,03 пайызбен «Қазақстан халық партиясы», 71,97 пайызбен «Nur Otan» және 10,18 пайызбен «Ақжол» өтіп тұр. Тағы бір «Кешенді әлеуметтік зерттеулер институты» ұйымы жүргізген экзитпол дерегіне жүгінсек, «Ауыл» партиясы да жеңіске жақын. Жалпы, бүгін, Орталық сайлау комиссиясы жариялайтын ресми қорытындыда бұл сандар өзгеріп, ахуал түпкілікті айқындалуы тиіс.
Облыстық, республикалық маңызы бар қалалар сайлау комиссиялары ұсынған мағлұматқа сәйкес, 2021 жылғы 10 қаңтардағы елорда уақыты бойынша сағат 22.00-де, сайлаушылардың 63,3%-ы дауыс берді.
Осылайша заңдар қабылдап, әзірлейтін және бюджетті бекітіп, Премьер-министрді тағайындауды қарастыратын 107 депутаттың 98-і партиялық тізімдер бойынша сайланса, қалған тоғызы Ассамблеядан келеді.
Мәжіліс депутаттарының өкілеттілік мерзімі – 5 жыл. Қойылатын талап: 25 жасқа толған Қазақстан азаматы болу және соңғы 10 жыл елде тұрып келу.
