Еңбек және халықты әлеуметтік қорғау министрлігі Ақтөбе облысының Хромтау ауданындағы «Весенне-Аралчинский» жерасты кенішіндегі төрт адам қаза тапқан топтық жазатайым оқиғаның мән-жайын тексеру үшін комиссия құрды, деп хабарлайды DalaInform ведомствоға сілтеме жасап.
Қайғылы оқиға 30 желтоқсан күні кешке жарылыс жұмыстарын орындау кезінде болған. Оқиға құрбандары – «Ақтөбе мыс компаниясы» ЖШС қызметкерлері: тау-кен шебері Асхат Қайқанов, жарушылар Рустам Шәметов пен Денис Черный, жүргізуші Берік Жақыпов. Өлімнің болжамды себебі – көміртегі тотығымен улану. Кеніштегі жұмыстар тоқтатылды. Қызметкерлер жер бетіне шығарылды.
«Болған оқиғаның мән-жайын анықтау үшін кенішке Ақтөбе облысы әкімінің орынбасары Сәлімгерей Бекбергенов, Хромтау ауданы әкімі Нағымжан Алдияров, Ақтөбе облысы еңбек инспекциясы жөніндегі басқарманың және өнеркәсіптік қауіпсіздік департаментінің басшылары барды. Еңбек министрлігі Ақтөбе облысы бойынша бас мемлекеттік еңбек инспекторы Саламат Аманбаевтың төрағалығымен топтық жазатайым оқиғаның мән-жайын әрі себептерін тексеру үшін арнайы комиссия құрды», – делінген ақпаратта.
Сондай-ақ комиссия құрамына еңбекминге қарасты еңбек, әлеуметтік қорғау және көші-қон комитеті еңбек жағдайларын бақылау және еңбекті қорғау басқармасының бас сарапшысы Рустам Рамазанов, ТЖМ өнеркәсіптік қауіпсіздік комитеті Ақтөбе облысы бойынша департаменті басшысының орынбасары Самат Тәждәулетов, ТЖМ өнеркәсіптік қауіпсіздік комитеті Ақтөбе облысы бойынша департаменті тау-кен металлургия өнеркәсібі және жарылыс жұмыстарын мемлекеттік қадағалау бөлімінің бас маманы Нұрсерік Сәрсенбаев кірді. Жұмыс беруші өкілі «Ақтөбе мыс компаниясы» ЖШС бас директоры орынбасары Анжелика Шипилова, ал еңбек ұжымы өкілі Қуанышбек Жанаисов. Тексеріс нәтижелері туралы қосымша хабарланады.
