Қазақстанның ірі қаласы мен Моңғолия астанасы арасында әуе рейсі ашылды, деп хабарлайды DalaInform еліміздің сыртқы істер министрлігіне сілтеме жасап.
Қазақстанның Моңғолиядағы елшісі Жалғас Әділбаев Моңғолия үкіметінің атқарушы агенттігі – азаматтық авиация бас басқармасы және «Хунну эйр» әуе компаниясының басшылығымен бірге аталған компанияның «Ұлан-Батыр – Алматы – Ұлан-Батыр» бағытындағы әуе қатынасын ашуға арналған баспасөз мәжілісіне қатысты.
Елші өз сөзінде Қазақстанның ең ірі мегаполисі мен Моңғолия астанасы арасындағы тікелей әуе қатынасының ашылуымен құттықтап, былтыр Нұр-Сұлтанда ҚР премьер-министрі Асқар Мамин және Моңғолия премьер-министрі Ухнаагийн Хурэлсухтың арасында өткен келіссөз барысында қол жеткізілген уағдаластықтың толық орындалғанын айтты.
Аталған жаңа әуе бағыты екіжақты саяси, сауда-экономикалық, мәдени-гуманитарлық, туристік саладағы байланыстың қарқынды дамуына мүмкіндік береді.
«Хунну эйр» әуе компаниясының ұшағы «Ұлан-Батыр – Алматы – Ұлан-Батыр» бағыты бойынша алғашқы репатриациялық рейсті де орындады. Covid-19 салдарынан туындаған әлемдегі эпидемиологиялық жағдай жақсарғаннан кейін ұшудың нақты жиілігі белгіленеді.
