Қызылордалық сақшылар Алматы облысында жоғалған ұлды тапты, деп хабарлайды DalaInform полицияға сілтеме жасап.
18 желтоқсанда сағат 15:30 шамасында Алматы облысы Жамбыл аудандық полиция бөліміне Қарасай ауданы тұрғынынан 12 жастағы баласының Үшбұлақ ауылындағы ата-әжесінің үйінен шығып, оралмағаны жайлы ақпарат түсті. Алматы облысының тәртіп сақшылары жоғалған жасөспірім туралы бағдарды Қазақстанның барлық өңіріне, шекаралас аумақтардағы полиция бекеттеріне таратты. Алматылық әріптестерінен келіп түскен бағдар бойынша іздестіру жұмыстарын бастаған Қызылорда облысының ювеналды полицейлері 21 желтоқсан күні кешкі сағат 20:45 шамасында Қызылорда қаласы Жаппасбай батыр көшесінің бойында ата-анасыз жүрген ұлды байқады.
«Тексеру барысында оның іздеуде жүрген бала екені белгілі болды. Қызылорда қаласы ювеналды полиция бөлімшесінің инспекторы Мұрат Байназаров жасөспірімді Қызылорда облысының кәмелетке толмағандарды бейімдеу орталығына орналастырды. Қазір сақшылар ұлдың ата-анасымен сөйлесіп, олардың облыс орталығына келуін күтіп отыр. Бұған қоса бұл оқиғаның себептері мен мән-жайы анықталып жатыр», – делінген polisia.kz мәліметінде.
