Қызылордалық полицейлер алимент төлеуден жалтарған 106 адамның жүрген жерін анықтады, деп хабарлайды DalaInform тәртіп сақшыларына сілтеме жасап.
Қызылорда облысы полиция департаментінің көші-қон қызметі борышкерлерді, алимент төлеуден жалтарғандарды және туыстық байланыстарын жоғалтқандарды табу мақсатында 2020 жылы бірқатар жұмыс атқарды. Статистикалық мәліметке сәйкес, сақшылар 2020 жылдың 12 айында алимент төлеуден жалтарған 126 тұлғаға іздеу жариялап, олардың 106-ның жүрген жерін анықтап, іздестіру істерін тоқтатты. Ал мемлекетке борышкер 33 азаматқа іздеу жарияланса, оның 30-ның мекенжайы табылды.
«Мәселен, Қызылорда қаласы полиция басқармасының көші-қон қызметі 2017 жылы іздеу жарияланған екі адамның, 2018 жылы іздеу жарияланған төрт тұлғаның жүрген жерін анықтады. 2017 жылдан бері алимент төлеуден жалтарған бір азамат Алматы қаласынан, тағы біреуі Нұр-Сұлтан қаласынан табылды», – делінген polisia.kz ақпаратында.
