Бүгін, 6 қаңтар, Петропавл қаласы әуежайы ауданында оқу-жаттығу ұшуын орындау кезінде авиациялық оқиға болды – «Аэропракт» ЖШС тиесілі BO-105 тіркеу нөмірі UP-ЕС114 тікұшағында оң қозғалтқышы істен шықты деп хабарлайды Dalainform тілшісі.
«ВО-105 UP-ЕС114 әуе кемесінің экипажы бекітілген ұшу жоспарына сәйкес тапсырманы орындады. Петропавл қаласының әуежайынан 20 шақырымда 300 фут берілген биіктік алынғаннан кейін тікұшақтың оң қозғалтқышының өздігінен істен шығуы орын алды. Әуе кемесінің командирі Петропавл қаласының әуежайында әуеден таңдалған алаңға мәжбүрлі түрде қонуға шешім қабылдады. Мәжбүрлі қонуды орындау алдында экипаж «Қазаэронавигация» РМК ӘҚҚ диспетчеріне қозғалтқыштың істен шығуы туралы баяндады», делінген «Аэропракт» ЖШС басшылығынан алынған алдын ала мәліметте.
Тікұшақтың 13:38-де қонды. Зардап шеккендер жоқ.
Авиациялық оқиға кезінде әуе кемесінің бортында ұшқыш-нұсқаушы және әуе кемесінің командирі болған.
ҚР Индустрия және инфрақұрылымдық даму министрлігінің қызметкерлері аталған авиациялық оқиғаға тексеру жүргізуге кірісті.
