Мемлекет басшысы Қырғыз Республикасының жаңадан сайланған президенті Жапаровпен телефон арқылы сөйлесті, деп хабарлайды DalaInform Ақордаға сілтеме жасап.
Қасым-Жомарт Тоқаев Садыр Жапаровты сайлаудағы жеңісімен құттықтап, дауыс беру нәтижесі ол ұсынған Қырғызстанның әлеуметтік-экономикалық тұрақты дамуын қамтамасыз ету және мемлекеттілігін одан әрі нығайту бағдарламасы бүкілхалықтық қолдауға ие болғанының куәсі екенін атап өтті. Қазақстан басшысы бауырлас Қырғызстанмен арадағы ынтымақтастықты екі ел халқының мүддесіне сәйкес достық, тату көршілік пен стратегиялық әріптестік рухында одан әрі дамыта беруге бейілді екенін нақтылады. Жапаров Қырғыз Республикасының тұрақты әрі байыпты дамуға бағытталған ұмтылысын үнемі қолдап келе жатқан президент және Қазақстан халқына алғыс айтты.
«Мемлекет басшылары екіжақты байланыстардың күн тәртібіндегі барлық мәселелері бойынша бірлесіп жұмыс істеуге дайын екендерін, сондай-ақ халықаралық ұйымдар шеңберіндегі іс-қимылдарды арттыруға ниеттілігін растады. Тоқаев Жапаровты Қазақстанға ресми сапармен келуге шақырды. Ол шақыруды қабыл алып, президент ретіндегі алғашқы сапарын Қазақстаннан бастайтынын айтты. Сонымен қатар ол мемлекет басшысын парламент сайлауының сәтті өтуімен құттықтады. Қасым-Жомарт Тоқаев Садыр Жапаровқа бауырлас Қырғызстан халқының игілігі жолындағы жауапты мемлекеттік қызметіне толағай табыс тіледі», – делінген ақпаратта.
