ІІМ Алматы академиясының бастығы қызметінен босатылды, деп хабарлайды DalaInform ішкі істер министрлігіне сілтеме жасап.
Мақан Есболатов атындағы ІІМ Алматы академиясының курсанты Саламат Өтегеновтің өліміне байланысты Алматы қаласының полиция департаменті қылмыстық кодекстің 105 бабы (өз-өзіне қол жұмсауға жеткізу) бойынша сотқа дейінгі тергеу жүргізіп жатыр. Тергеу барысында қаза тапқан адамның туыстары баяндаған барлық дәлел тексеріледі. Оқу орнына ішкі істер министрлігі кадр саясаты және өзіндік қауіпсіздік департаменттері басшылығы мен жауапты қызметкерлерден арнайы топ жіберілді. Тексеру қорытындысы бойынша ІІМ-де тәртіптік комиссия өтті.
«Өзіне сеніп тапсырылған бөлімшеде жұмысты ұйымдастыруға тиісті бақылау жүргізбегендіктен ішкі істер министрінің бұйрығымен академия бастығы О. Х. Смайылов атқарып отырған лауазымынан босатылды. Сондай-ақ оның идеологиялық тәрбие және кадр жұмысына жетекшілік ететін орынбасарын да қызметінен босату ұсынылды. Сонымен қатар оқу орнының тағы 16 жауапты қызметкері қатаң тәртіптік жауапкершілікке тартылды. Олардың бесеуі жұмысынан босатылды», – делінген ақпаратта.
Академияның оқу процесіне, тұрмыстық жағдайына, моральдық-психологиялық ахуалына, қаржы-шаруашылық қызметіне кешенді тексеру тағайындалды. Оқу орнына министрліктің ішкі аудит, кадр саясаты және өзіндік қауіпсіздік департаменттері қызметкерлері жіберілді. Министр Ерлан Тұрғымбаевтың тапсырмасы бойынша, осындай тексерулер 2021 жылдың 1 тоқсанында ІІМ-нің барлық оқу орнында жүргізіледі.
Атап өтсек, бір аптадан астам уақыт бұрын Алматы академиясында 3 курста оқыған 19 жастағы курсант Саламат Өтегенов асылған күйінде табылды. БҚО тумасы өз өліміне дейін ата-анасынан ірі сомада ақша сұрапты.
