Ұлттық қауіпсіздік комитеті карантиндік шектеулер кезінде Қазақстан аумағына заңсыз кіру-шығу арнасын тоқтатты, деп хабарлайды DalaInform.
Шығыс Қазақстан облысындағы ҰҚК департаменті жеке медицина орталығының ел шекарасынан заңсыз өтуге қолданылатын жалған дәрігерлік консультациялық комиссия қорытындыларын сату бойынша қызметін тоқтатты.
«2020 жылғы 18 қыркүйекте жедел-іздестіру шаралары барысында аталған медицина орталығы қызметкерлерінің заңсыз әрекеті расталды. Тергеу нәтижесінде алдында берілген 200-ге жуық дәрігерлік консультациялық комиссия қорытындысы, дәрігерлердің қолы мен таңбалары қойылған толтырылмаған бланкілер, таңбалар және компьютерлік техника табылып, тәркіленді. Куәгерлерден жауап алу кезінде дәрігерлік консультациялық комиссия қорытындыларының түпнұсқалары алынып, сәйкес экспертизаға жолданды», – делінген мәліметте.
Белгілі болғандай, медицина орталығы директорының орынбасары мен бас дәрігері жалған дәрігерлік консультациялық комиссия қорытындыларын бес мың теңгеге сатып отырған. Сонымен қатар шетелдік медицина мекемесінен шақыру қажет болған жағдайда, қызмет бағасын он мың теңгеге бағалаған. Шығыс Қазақстан облысындағы ұлттық қауіпсіздік комитеті департаменті аталған факт бойынша қылмыстық кодекстің 385-бабы, 1-тармағы бойынша қылмыстық іс қозғады. Жүргізілген тергеу шаралары және жинақталған дәлелдемелер нәтижесінде күдіктілер өз кінәсін толығымен мойындады.
«2020 жылғы 19 қарашада сот күдіктілерді қылмыстық кодекстің 385-бабы, 2-тармағы бойынша кінәлі деп танып, әрқайсысына 1000 АЕК көлемінде айыппұл салды. Тағы айта кететін жайт, соңғы уақытта түрлі әрекет арқылы Қазақстан-Ресей шекарасынан заңсыз өту талпыныстары байқалады. Биылғы қыркүйектен бастап Шығыс Қазақстан облысының үш тұрғыны жалған дәрігерлік консультациялық комиссия қорытындыларын пайдалану жолымен шекарадан заңсыз өтпек болды», – дейді ҰҚК.
