Қорғаныс министрлігі кадр және әскери білім департаментінің бұрынғы бастығы, генерал-майор Көпбаев пара алғаны үшін сотталды, деп хабарлайды DalaInform сыбайлас жемқорлыққа қарсы іс-қимыл агенттігіне сілтеме жасап.
Сыбайлас жемқорлыққа қарсы қызмет пара алу фактісі бойынша қорғаныс министрлігі кадр департаментінің бұрынғы бастығы, генерал-майор Қ.Р. Көпбаевқа қатысты қылмыстық істі аяқтады.
2019 жылдың мамыр айында Көпбаевтың Ақтөбе қаласындағы «Т.Бигелдинов атындағы әуе қорғанысы күштерінің әскери институты» РММ-не офицерлік лауазымға тағайындағаны үшін 200 мың теңге сомасында пара алғаны анықталды.
«Ақмола гарнизоны әскери сотының үкімімен Көпбаев мемлекеттік қызметте лауазым атқару құқығынан өмір бойына айырылып, 5 жылға бас бостандығынан да айырылды. Сонымен бірге сот президент атына оны генерал-майор әскери атағы мен «Құрмет» орденінен айыру туралы ұсыныс енгізеді», – делінген ақпаратта.
