Президент тапсырмасына сәйкес Қазақстанда «Өнеркәсіпті дамыту қоры» АҚ құрылды, деп хабарлайды DalaInform Индустрия және инфрақұрылымдық даму министрлігіне сілтеме жасап.
Қор «Индустриялық даму» мен «Нұрлы жол» мемлекеттік бағдарламаларының қаржы операторы – «ҚДБ-Лизинг» АҚ базасында құрылды.
Қасым-Жомарт Тоқаев биылғы Қазақстан халқына жолдауында «еліміздің алдында тұрған маңызды мақсат – өнеркәсіптік әлеуетті барынша дамыту» деген болатын.
Үкімет алдына ішкі және сыртқы нарықтарда өңдеу өнеркәсібі кәсіпорындарының бәсекеге қабілетін арттыру бойынша міндеттер қойылды. Сонымен қатар мемлекет басшысы өңдеу өнеркәсібінің өндірісін бес жыл ішінде кем дегенде 1,5 есе көбейту жөнінде нақты тапсырма берді.
Индустрия және инфрақұрылымдық даму министрлігі «ҚДБ-Лизингімен» бірлесіп, отандық өңдеу өнеркәсібі кәсіпорындарын жаңғырту мен отандық өндіріс тауарларына сұранысты ынталандыру жөніндегі бағдарламаларды іске асырып келеді.
Қор құру отандық өңдеу өнеркәсібі кәсіпорындарына мемлекеттік қолдау шараларын кеңейтуге мүмкіндік береді. Қор отандық кәсіпорындарды 3%-дан аспайтын мөлшерлемемен қолжетімді қаржыландыруды қамтамасыз етеді.
